قصيدة (أهل القانون) بالعامية من تأليف: يسري عطية

أهل القانون عدد في اللمون
يسدوا العيون وما يحلوش قضية

آدي محامي منافق حرامي
يسجن غلابة ويسرق ولية

يلفق قضايا أروح له برضايا
يصالح خصومي ويقبض علية

أقوله يا فندي دالحق عندي
وانت وكيلي و كل اللي لية

يرد بجنون بثغرة قانون
يبيعني لغريمي ويقبض ماهية

ويقوللي شطارة ياابن الحمارة
هاتطلع براءة اصبر علية

هاخد فلوسه واصالحك عليه
فاهمني يا بيه يابو دماغ غبية

أقول يا مغيث هاروح للبوليس
يضحك يقوللي ماهو احنا في تكية

الظابط فلان والباشا فلان
بنقسم في قوتك ولقمة هنية

يعني تمام تقول باحترام
يحيا قانون الناس اللي هية

لذيذة وبتناقش مشكلة مهمة حقيقى دلوقتى هو ده اللى بيحصل وهناك مقولة ظهرت في الأيام الأخيرة بتقول " لو اتملى البحر الأحمر صلصة مش هتكفى الكوسة اللى في بلدنا " وياريت تكتب واحده عن التعليم ومشاكله اللى اصبحت مأساه . ابتسام&مريم

كلام رائع

عند حضرتك حق هو دة اللى موجود الوقتى فعلا ومش دة وبس وفى اكتر من كدة شكرا على القصيدة اللى اتكلمت على لسان الجميع

كلام حضرتك جميل وهى دى الحقيقة مش مبالغة
واتمنى لحضرتك مزيد من التوفيق والنجاح

قصيدة رائعة تحملـ من المعانى الكثيـــــــــــــــــــــــــر

عنك حق والله الاء انا دايما كل ما ادخل لازم اقرئها
بتهدى اعصابى

ميرسى يا مستر فعلا معظم المحامين بيعملوا كدة بس لسة فى ناس عندهم ضمير وبيخافوا ربهم وميرسى على مجهودك